غني يا زاهر الدحنون
وارقص يا خبز الطابون
طاح الشومر والزعتر
وودعنا سقعة كانون
فرحت عنزة جارتنا
لبست لاخضر قريتنا
من الخبيزة مونتنا
والبزيلا ام قرون
الفلاح الي مكيف
مع انه الجو مصيف
بدو شهرين ونيف
وهو يوكل بقلة بليمون
من الصبح بدري يقوم
يحضر لقنابة لكروم
يحمل ع ظهرة القدوم
ويكشكش نتش وطيون
بتطربني ها العصافير
تغردقبل الشمس تنير
ع التوتة تهدى وتطير
بلبل قبر وحسون
والا مقيقات الشنار
في نيسان وفي اذار
والمداحي بالقنطار
باض هون وقاقت هون
ميل بزر فول اخضر
وشوف الحنون الاصفر
ولقط خرفيش وزعتر
لملم واشوي حلزون
وان غطست في ميه
ميه مكر شوية
وريحة الميرمية
اطيب ريحة بكل الكون
حضر لزراعة الصيف
خلي تراب الارض خفيف
الكوسا والفكوس نظيف
وشمر رجل البنطلون
شو بدي احكي تاحكي
قريتنا خير وبركة
الله يديملنا الضحكة
يارض التين والزيتون
موضوع: فصل الربيع بعيون فلاحين بلدة سلواد 
الخميس أبريل 16, 2009 11:40 am
